ಸಾಹಿತಿಗಳ ಮಾಹಿತಿ

ಕೆ.ಎಸ್.ನರಸಿಂಹಸ್ವಾಮಿ

ಕೆ.ಎಸ್.ನರಸಿಂಹಸ್ವಾಮಿ (26-01-1915 – 28-12-2003)

ಕನ್ನಡದ ನವೋದಯ ಕಾಲದ ಶ್ರೇಷ್ಠ ಕವಿ, ಅನುವಾದಕ, ವಿಮರ್ಶಕ ಕೆ.ಎಸ್.ನ ಎಂದೇ ಕನ್ನಡ ಸಾಹಿತ್ಯ ಲೋಕದಲ್ಲಿಪರಿಚಿತರಾದ ಕೆ.ಎಸ್.ನರಸಿಂಹಸ್ವಾಮಿ ಅವರು 26-01-1915ರಂದುಮಂಡ್ಯ ಜಿಲ್ಲೆಯ ಕೆ.ಆರ್. ಪೇಟೆ ತಾಲ್ಲೂಕಿನ ಕಿಕ್ಕೇರಿ ಎಂಬ ಗ್ರಾಮದಲ್ಲಿ ಜನಿಸಿದರು. ತಂದೆ ಸುಬ್ಬರಾವ್ ಮತ್ತು ತಾಯಿ ನಾಗಮ್ಮ. ಕೆ.ಎಸ್.ನರಸಿಂಹಸ್ವಾಮಿಯವರು ಜನಿಸಿದ ಕೆಲಕಾಲದ ನಂತರ ಸುಬ್ಬರಾಯರು ಕಿಕ್ಕೇರಿ ತೊರೆದು ಮೈಸೂರಿನಲ್ಲಿ ನೆಲೆಸಿದರು.

ಕೆಎಸ್‌ನ ಅವರ ವಿದ್ಯಾಭ್ಯಾಸ ಪದವಿ ಶಿಕ್ಷಣದವರೆಗೆ ಮೈಸೂರಿನಲ್ಲಿ ನಡೆಯಿತು. ಮೈಸೂರಿನ ಮಹಾರಾಜಾ ಹೈಸ್ಕೂಲಿನಲ್ಲಿ ಶಿಕ್ಷಣದ ನಂತರ ಎಂಜಿನಿಯರಿಂಗ್ ಶಿಕ್ಷಣ ಪಡೆಯಲು ವಿಜ್ಞಾನದ ವಿಷಯಗಳನ್ನು ಆಯ್ಕೆ ಮಾಡಿಕೊಂಡು ಮೈಸೂರಿನ ಇಂಟರ್ಮೀಡಿಯೆಟ್ ಕಾಲೇಜಿನ ಪ್ರಿ-ಎಂಜಿನಿಯರಿಂಗ್’ ವಿಭಾಗದಲ್ಲಿ ವಿದ್ಯಾಭ್ಯಾಸ ಮಾಡಿದರು. ಪದವಿಪೂರ್ವ ಶಿಕ್ಷಣ ಮುಗಿದ ನಂತರ ಬೆಂಗಳೂರಿನ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ವಿದ್ಯಾಭ್ಯಾಸ ನಡೆಸಿದರು. ಆ ಕ್ಷೇತ್ರದಲ್ಲಿ ಆಸಕ್ತಿ ಇಲ್ಲದಿರುವುದರಿಂದ ಶಿಕ್ಷಣ ಕ್ಷೇತ್ರವನ್ನು ಬದಲಿಸಿ, ಬಿ.ಎ. ಮಾಡಲು ಬೆಂಗಳೂರಿನ ಸೆಂಟ್ರಲ್ ಕಾಲೇಜಿಗೆ 1934ರಲ್ಲಿ ಸೇರಿಕೊಂಡರು. ಸೆಂಟ್ರಲ್ ಕಾಲೇಜಿನಲ್ಲಿ ಇಂಗ್ಲಿಷ್ ಪ್ರಾಧ್ಯಾಪಕರಾಗಿದ್ದ ಬಿಎಂಶ್ರೀ, ಕೆಎಸ್‌ನ ಅವರಿಗೆ ಇಂಗ್ಲೀಷ್ ಕಾವ್ಯದ ಬೋಧಕರಾಗಿದ್ದರು.

ಹೀಗೆ ಬೆಂಗಳೂರಿನಲ್ಲಿ ವಾರಾನ್ನ ಮಾಡಿಕೊಂಡು ವಿದ್ಯಾಭ್ಯಾಸ ಮುಂದುವರೆಸುತ್ತಿದ್ದ ಅವಧಿಯಲ್ಲಿ ಜೂನಿಯರ್ ಬಿ.ಎ. ಮುಗಿಸುವ ವೇಳೆಗೆ ಅವರ ತಂದೆ ನಿಧನರಾದರು. ನಂತರ ಪದವಿ ಶಿಕ್ಷಣ ಪೂರೈಸಲಾಗಿದೆ ಅರ್ಧಕ್ಕೇ ನಿಲ್ಲಿಸಿ ಮೈಸೂರಿಗೆ ವಾಪಸಾದರು. ಸಂಸಾರದ ಜವಾಬ್ದಾರಿ ನಿರ್ವಹಿಸಲು ತಂದೆ ಕೆಲಸ ನಿರ್ವಹಿಸುದ್ದ ಅಂಗಡಿಯಲ್ಲಿ ಲೆಕ್ಕ ಬರೆಯುವ ಕೆಲಸಕ್ಕೆ ಸೇರಿಕೊಂಡರು. ಅನಂತರ ಸರ್ಕಾರಿ ನೌಕರಿ ಸಿಕ್ಕಿದ ಕಾರಣದಿಂದಾಗಿ ಆರ್ಥಿಕ ಪರಿಸ್ಥಿತಿಯಲ್ಲಿ ಸುಧಾರಣೆ ಕಂಡುಬಂದಿತು. ಬೆಂಗಳೂರಿನ ಹೌಸಿಂಗ್ ಬೋರ್ಡ್ ಕಛೇರಿಯಲ್ಲಿ ಕಾರ್ಯ ನಿರ್ವಹಿಸಿ 1970೦ರಲ್ಲಿ ಸೇವೆಯಿಂದ ನಿವೃತ್ತರಾದರು. ನಿವೃತ್ತಿ ನಂತರ ಎರಡು ವರ್ಷ ಕರ್ನಾಟಕ ಸಾಹಿತ್ಯ ಅಕಾಡೆಮಿಯಲ್ಲಿ 1972-74 ಹಾಗೂ ಯುವ ಕರ್ನಾಟಕದ ಸಂಪಾದಕರಾಗಿ 1974-76 ಕೆಲಸ ನಿರ್ವಹಿಸಿದರು.

1936ರಲ್ಲಿ ತಿಪಟೂರಿನಲ್ಲಿ ಶಿರಸ್ತೆದಾರರಾಗಿದ್ದ ನಾಡಿಗ ಭೀಮರಾಯರ ಮಗಳು ವೆಂಕಮ್ಮನವರೊಂದಿಗೆ ವಿವಾಹ ನೆರವೇರಿತು. ಇವರಿಗೆ ನಾಲ್ಕು ಗಂಡು ಮಕ್ಕಳು ಮತ್ತು ನಾಲ್ಕು ಹೆಣ್ಣು ಮಕ್ಕಳಾದರು. ಸರಕಾರಿ ನೌಕರಿಯಿಂದ ನಿವೃತ್ತಿ ನಂತರ ಬೆಂಗಳೂರಿನ ಜಯನಗರದಲ್ಲಿ ಅನಂತರ ಬನಶಂಕರಿ ಬಡಾವಣೆಯಲ್ಲಿರುವ ‘ಕಾವ್ಯಶ್ರೀ’ ಎಂಬ ಸ್ವಂತ ಮನೆಯಲ್ಲಿ ವಾಸವಾಗಿದ್ದರು. 28-12-2003ರಂದು ಕಾಲವಶರಾದರು.

ಒಲುಮೆಯ ಕವಿಯೆಂದೇ ಪ್ರಸಿದ್ಧರಾದ ಕೆ.ಎಸ್.ನರಸಿಂಹಸ್ವಾಮಿಯವರು ನವೋದಯದ ಅವಧಿಯಲ್ಲಿ ಕಾವ್ಯಕೃಷಿ ಆರಂಭಿಸಿ, ನವ್ಯ, ದಲಿತ – ಬಂಡಾಯ ಸಾಹಿತ್ಯದ ಅವಧಿಯಲ್ಲೂ ಕವಿನಗಳನ್ನು ಬರೆದರು. ವಿವಾಹಾನಂತರದ ಪ್ರೇಮ ಅವರ ಕಾವ್ಯದ ವಸ್ತುವಾಗಿರುವುದು ವಿಶೇಷ. ಅದರ ಜೊತೆಗೆ ವ್ಯಕ್ತಿ, ವೈಯಕ್ತಿಕ, ಸಾಮಾಜಿಕ, ರಾಜಕೀಯ ವಿಷಯಗಳನ್ನೂ ಸೂಕ್ಷ್ಮವಾಗಿ ಅವರ ಕವಿತೆಗಳು ಒಳಗೊಂಡಿವೆ. ಎಳೆಯ ಪ್ರಾಯದ ಗಂಡುಹೆಣ್ಣಿನ ನವಿರಾದ ಭಾವನೆಗಳು, ತಾಕಲಾಟ, ತೊಳಲಾಟಗಳು ಇವರ ಕವಿತೆಯಲ್ಲಿ ಸಮರ್ಥವಾಗಿ ಒಡಮೂಡಿವೆ. ಕವಿ, ಅನುವಾದಕ, ವಿಮರ್ಶಕರಾಗಿ ಕನ್ನಡ ಸಾಹಿತ್ಯ ಲೋಕವನ್ನು ಇವರು ಬೆಳಗಿದ್ದಾರೆ.

ಕೆ.ಎಸ್‌.ನರಸಿಂಹಸ್ವಾಮಿಯವರ ಕೃತಿಗಳು:

ಕಾವ್ಯ

ಮೈಸೂರ ಮಲ್ಲಿಗೆ – 1942
ಐರಾವತ – 1945
ದೀಪದ ಮಲ್ಲಿ – 1947
ಉಂಗುರ – 1949
ಇರುವಂತಿಗೆ – 1954
ಶಿಲಾಲತೆ – 1958
ಮನೆಯಿಂದ ಮನೆಗೆ – 1960
ತೆರೆದ ಬಾಗಿಲು – 1979
ನವ ಪಲ್ಲವ – 1989
ಮಲ್ಲಿಗೆಯ ಮಾಲೆ (ಸಮಗ್ರ ಕಾವ್ಯ ಸಂಪುಟ)
ದುಂಡು ಮಲ್ಲಿಗೆ – 1983
ನವಿಲ ದನಿ – 1999
ಸಂಜೆ ಹಾಡು – 2000
ಕೈಮರದ ನೆಳಲಲ್ಲಿ – 2001
ಎದೆ ತುಂಬ ನಕ್ಷತ್ರ – 2002
ಮೌನದಲಿ ಮಾತ ಹುಡುಕುತ್ತ – 2003
ದೀಪ ಸಾಲಿನ ನಡುವೆ – 2003
ಹಾಡು-ಹಸೆ (ಆಯ್ದ ಅತ್ಯುತ್ತಮ ಗೀತಗಳು) 2003
ಮಲ್ಲಿಗೆಯ ಮಾಲೆ (ಸಮಗ್ರ ಕಾವ್ಯ ಸಂಪುಟ 1942- 2004) 2004

ಗದ್ಯ:

ಎರಡು ಸಣ್ಣ ಕಥೆಗಳು – 1941, 1965
ಉಪವನ – 1958
ದಮಯಂತಿ – 1960
ವಿ.ಸೀ. – 1970
ಸಿರಿಮಲ್ಲಿಗೆ – 1990
ನುಡಿ ಮಲ್ಲಿಗೆ – 1990

ಅನುವಾದ

ಮೋಹನ ಮಾಲೆ (ಗಾಂಧೀಜಿ ಸುಭಾಷಿತಗಳು) – 1956
ನನ್ನ ಕನಸಿನ ಭಾರತ (ಗಾಂಧೀಜಿ ಕೃತಿಗಳಿಂದ ಆಯ್ದ ಭಾಗಗಳು) -1961
ಪ್ರಪಂಚದ ಬಾಲ್ಯದಲ್ಲಿ (ವೆರಿಯರ್ ಎಲ್ವಿನ್: ಜಾನಪದ ಕಥೆಗಳು) – 1965
ಮೀಡಿಯ (ಯೂರಿಪಿಡೀಸ್‌ ನಾಟಕ) – 1966
ಹಕಲ್‌ಬರಿ ಫಿನ್ನನ ಸಾಹಸಗಳು (ಮಾರ್ಕ್ ಟ್ರೇನ್ ಕಾದಂಬರಿ) – 1969
ಸುಬ್ರಹ್ಮಣ್ಯ ಭಾರತಿ (ಪ್ರೇಮ ನಂದಕುಮಾ‌ರ್) – 1971
ಜಾರ್ ಸುಲ್ತಾನಾ ಮತ್ತು ಹಂಸವತಿ, ಪುಷ್ಕಿನ್ನನ ಕವಿತೆಗಳು – 1971
ರಾಣಿಯ ಗಿಳಿ ಮತ್ತು ರಾಜನ ಮಂಗ (ಮಕ್ಕಳ ಗೀತೆಗಳು) – 1972
ಮಾಯಾಶಂಖ ಮತ್ತು ಇತರ ಕಥೆಗಳು (ಮಕ್ಕಳ ಕಥೆಗಳು) 1972
ಪತ್ರಗುಚ್ಛ: (ನೆಹರು ಪತ್ರಗಳು); ಎಸ್.ಆರ್. ರಾಮಸ್ವಾಮಿಯವರೊಡನೆ -1975
ರಾಬರ್ಟ್ ಬರ್ನ್ ಕವಿಯ ಕೆಲವು ಪ್ರೇಮಗೀತಗಳು 1997
ಕೆಲವು ಚೀನೀ ಕವನಗಳು 1997

ಅನ್ಯ ಭಾಷೆಗೆ ಅನುವಾದಿತ ಕೃತಿಗಳು

Tr. P. Sreenivasa Rao & Sumateendra Nadig, The Buddha Smile; Kavyalaya, 1993
Tr. Ramachandra Sharma, The Open Door; Sahitya Akademi, 2001

ಕೆ.ಎಸ್‌.ನರಸಿಂಹಸ್ವಾಮಿ ಅವರ ಕೃತಿಗಳ ಕುರಿತು ಪ್ರಕಟಿತ ವಿಮರ್ಶಾ ಕೃತಿಗಳು/ಲೇಖನಗಳು

ಆಮೂರ, ಜಿ.ಎಸ್., ಕೆ.ಎಸ್. ನರಸಿಂಹಸ್ವಾಮಿ: ಲೌಕಿಕ ಕಾವ್ಯ’ ಕೊರಳು-ಕೊಳಲು; ಪ್ರಿಯದರ್ಶಿನಿ ಪ್ರಕಾಶನ, 2005
ಕುರ್ತಕೋಟಿ, ಕೀರ್ತಿನಾಥ, ಕೆ.ಎಸ್. ನರಸಿಂಹಸ್ವಾಮಿ, ನೂರು ಮರ ನೂರು ಸ್ವರ; ಕನ್ನಡ ವಿ.ವಿ., 1998
ಕೊಡ್ಲೆಕೆರೆ, ಚಿಂತಾಮಣಿ, ‘ಶೋಧನ ಪ್ರಧಾನ ಮಾದರಿ,’ ಅಂತರಂಗದ ಆಕಾಶ; ಚಿತ್ರಮೂಲ ಪ್ರಕಾಶನ, 2006
ನರಹಳ್ಳಿ, ಬಾಲಸುಬ್ರಹ್ಮಣ್ಯ, ಇಹದ ಪರಿಮಳದ ಹಾದಿ; ಲಿಪಿ ಪ್ರಕಾಶನ, 1995
ನಂಗಲಿ, ಚಂದ್ರಶೇಖರ ವಿ. ‘ಕೆ.ಎಸ್.ನ ಕಾವ್ಯದಲ್ಲಿ ಪರಿಸರ ಮತ್ತು ಭೂಮಿತತ್ವ, ಸಂಕ್ರಮಣ, 2007
ನಾಗರಾಜ್, ಡಿ.ಆರ್ಣ., ‘ಕೆ.ಎಸ್. ನರಸಿಂಹಸ್ವಾಮಿಯವರ ಕಾವ್ಯದಲ್ಲಿ ಭೂಮಿ, ಶಕ್ತಿ ಶಾರದೆಯ ಮೇಳ; ಅಕ್ಷರ ಪ್ರಕಾಶನ, 1983
ನಾಡಿಗ, ಸುಮತೀಂದ್ರ, ಮೌನದಾಚೆಯ ಮಾತು; ಸಪ್ನ ಬುಕ್‌ಹೌಸ್, 2007
ನಾಯಕ, ಜಿ. ಪ್ರಶಾಂತ, ಪ್ರೀತಿಯ ಬದುಕು; ನಮ್ಮ ಪ್ರಕಾಶನ, 2004
ರಾಘವೇಂದ್ರ ರಾವ್, ಎಚ್.ಎಸ್., ‘ನವ ಪಲ್ಲವ ಒಂದು ಪರಿಚಯ,’ ನಿಲವು; ಕ್ರೈಸ್ಟ್ ಕಾಲೇಜ್ ಕನ್ನಡ ಸಂಘ, 1989

10 ‘ಸಂಜೆ ಹಾಡು, ತರು ತಳೆದ ಪುಷ್ಪ; ಕ್ರೈಸ್ಟ್ ಕಾಲೇಜ್ ಕನ್ನಡ ಸಂಘ, 2004

‘ನಿಮ್ಮುಸಿರು ನನ್ನ ಕವಿತೆ,’ ಮುನ್ನುಡಿ, ಮಲ್ಲಿಗೆಯ ಮಾಲೆ; ಲಿಪಿ ಪ್ರಕಾಶನ, 2004
ರಾಮಚಂದ್ರನ್, ಸಿ.ಎನ್, “ಗಡಿಯಾರದಂಗಡಿಯ ಮುಂದೆ’: ಒಂದು ವ್ಯಾಖ್ಯಾನ,” ಗಾಂಧಿ ಬಜಾರ್ ಮೇ, 2007
ರಾಮೇಗೌಡ, ಕೆ.ಎಸ್. ನರಸಿಂಹಸ್ವಾಮಿ; ನವ ಕರ್ನಾಟಕ, 2002
(ಸಂ) ಶಿವರುದ್ರಪ್ಪ, ಜಿ.ಎಸ್., ಚಂದನ; ಕೆಎಸ್‌ನ ಅಭಿನಂದನ ಸಮಿತಿ, 1972. ಈ ಅಭಿನಂದನಾ ಗ್ರಂಥದಲ್ಲಿ ಹಿರಿಯ ಕವಿಗಳಾದ ಪುತಿನ, ಜಿಎಸ್ಎಸ್, ಕಣವಿ, ಜಿ.ಎಸ್. ಸಿದ್ದಲಿಂಗಯ್ಯ, ಕೀರ್ತಿನಾಥ ಕುರ್ತಕೋಟಿ ಸೇರಿದಂತೆ ವಿದ್ವಾಂಸರು ಬರೆದಿರುವ 32 ಮಹತ್ವದ ಲೇಖನಗಳು ಇವೆ.

ಪ್ರಶಸ್ತಿ-ಪುರಸ್ಕಾರಗಳು