ದೇವರಲ್ಲಿ ದುಃಖಿತ ದಂಪತಿಗಳ ಮನವಿ
ಅತಿ ಓದಿದಂತಹ ಮಕ್ಕಳು ಕೊಡದಿದ್ದರೂ ಚಿಂತೆ ಇಲ್ಲ
ನಮ್ಮ ದುಃಖಗಳಿಗೆ ಸ್ಪಂದಿಸುವಂತಹ ಸೂಕ್ಷ್ಮತೆಯುಳ್ಳ
ಮಕ್ಕಳನ್ನು ಕೊಡು ದೇವ
ಅತಿಯಾದ ಶ್ರೀಮಂತಿಕೆ ಮಕ್ಕಳಿಗೆ ಕೊಡದಿದ್ದರೂ ಚಿಂತೆ ಇಲ್ಲ
ಒಂದಷ್ಟು ಹೃದಯವಂತಿಕೆಯನ್ನು ಕೊಡು ದೇವ
ಅರಮನೆ ಕಟ್ಟಿಸದಿದ್ದರೂ ಚಿಂತೆ ಇಲ್ಲ
ಸುಖದ ಬದುಕು ಕೊಡದಿದ್ದರೂ ಚಿಂತೆ ಇಲ್ಲ
ಕಾಲುಗಳು ಸೋತ ಸಂದರ್ಭದಲ್ಲಿ
ಹೆಗಲು ಕೊಟ್ಟು ರಕ್ಷಿಸಿಕೊಳ್ಳುವ
ಶ್ರೀಮಂತ ಮಕ್ಕಳಕೊಡು ದೇವ
ಬಾಳಿನ ಸಂಧ್ಯಾ ಕಾಲದಲ್ಲಿ ಜೊತೆಯಲ್ಲಿ ಇರದಿದ್ದರೂ ಚಿಂತೆ ಇಲ್ಲ
ನಮ್ಮ ಹೆಣಗಳು ಸಂಸ್ಕಾರಕ್ಕೆ ದೀರ್ಘವಾಗಿ
ಕಾಯುವಂತಾಗದಷ್ಟು ಸನಿಹದಲ್ಲಿ ಇರಲಿ
ದೇವರಂತೆ ನಮ್ಮ ಪೂಜಿಸದಿದ್ದರೂ ಚಿಂತೆ ಇಲ್ಲ
ಹಸಿವು ಬಾಧಿಸಿದಂತೆ ಅನ್ನವ ಕೊಟ್ಟು ಸಲುಹಿದರೆ ಸಾಕು
ಬಂಗಾರದ ಒಡವೆ ಕೊಡಿಸದಿದ್ದರೂ ಚಿಂತೆ ಇಲ್ಲ
ಒಂದಷ್ಟು ಪ್ರೀತಿಯನ್ನು ಕೊಡುವಂತ ಮಕ್ಕಳ ಕೊಡು ದೇವ
– ಕೆ ಎಸ್ ನಾಗರಾಜ್, ಬೆಂಗಳೂರು
