ನೆನಪು ಸುಳ್ಳಲ್ಲ
ಚಲಿಸುವ ರೈಲಿನಲ್ಲಿ ನಿದ್ದೆ ಬಾರದ ಇರುಳು
ಮರುಕಳಿಸುವ ನೆನಪುಗಳು ಒಂದಲ್ಲ ಎರಡಲ್ಲ
ಪ್ಯಾಲೆಸ್ಟೈನ್ ಗಾಜಾಪಟ್ಟಿ ಇಸ್ರೇಲ್ ಉಕ್ರೇನ್
ಯಾರತಪ್ಪಿಗೆ ಯಾರು ಹೊಣೆ ಇನ್ನಾರು ಬಲಿ
ದೀಪದ ಬುಡದಲ್ಲಿ ಕತ್ತಲು ಮಣಿಪುರ
ಮೈತೇಯಿ ಕುಕಿಗಳ ಯಾದವೀ ಕಲಹಕ್ಕೆ
ಬೆಂಕಿ ಹಚ್ಚಿದ ದುರುಳ ಧೂರ್ತರು
ಮೈ ಕಾಯಿಸಿಕೊಳ್ಳುವ ವಣಿಕರು
ಯಾರ ಮನೆ ಹಾಳಾದರೇನು ಅಲ್ಲೊಂದು
ಕರುವ ಕಟ್ಟುವ ಇರಾದೆಯ ಗೋದ್ರಾ ಬಲಿಗರು
ಕತ್ತಲು ಸೀಳಿ ಮುನ್ನುಗ್ಗುತ್ತಿದೆ ರೈಲು
ಬಾರದ ನಿದ್ರೆಗೆ ಉರಿಯುವ ಬೆಂಕಿ ನೆನಪು
ಭೂಖಂಡದಲಿ ಉಂಡವರ ಹುಳಿದೇಗು
ಅಬ್ಬರಿಸಿ ಬಾಂಬುಗಳ ಸಿಡಿತ ಮಾತೆ ಮಕ್ಕಳ
ನೆತ್ತರಲ್ಲಿ ನೆಂದ ನೆಲದ ತುಂಬಾ ಬಿಕ್ಕಳಿಸಿ ಬುದ್ಧ
ಗಾಂಧಿ ಕೋಲನು ಹಿಡಿದು ನಡೆದು ಬಂದ.
ನಿಂತ ನಿಲ್ದಾಣದಲಿ ಹೆಜ್ಜೆ ಸಾಗಿದ ಗತಿಗೆ
ಕೋಲು ಸಪ್ಪಳ ಜೊತೆಗೆ ಕರುಣೆ ಪ್ರೀತಿ
ಸಾವಿರದ ಸಂಖ್ಯೆಯಲಿ ಮೌನಿ ಭಿಕ್ಕುಗಳು
ಮೂಡಣದ ಮುಗಿಲಲ್ಲಿ ಮಬ್ಬುಹರಿದಾ ಬೆಳಗು.
– ಎಸ್ ಜಿ ಸಿದ್ಧರಾಮಯ್ಯ
