ಸತ್ತ ಕವಿಯ ಸುತ್ತ
ದಶಕಗಳ ಕಾಲ ಕವಿತೆಗಳ ಹೆತ್ತು ಹೊತ್ತು
ಸುಸ್ತಾದ ಕವಿ ಸತ್ತ ಮಾರನೆಯ ದಿನ
ಎಲ್ಲೆಲ್ಲೂ ಅದೇ ಸುದ್ದಿ ಸಮಾಚಾರ
ಮಳೆ ನಿಂತ ಮೇಲೂ ಹನಿಗಳು ಸಾವಿರ
ಆತನ ಸಾಧನೆ ಸಂವೇದನೆಗಳ ಮರೆತು
ಬರೀ ಕುಡಿತ ಅಶಿಸ್ತು ಅರಾಜಕತೆಯ ಕುರಿತು
ಮಾಡಿದ ಸಾಲ ಸುಳ್ಳಿನ ಜಾಲ
ನಿರಂತರ ಸೋಲು ಛಿದ್ರವಾದ ಬಾಳು
ನಕಾರ ನುಡಿಗಳ ಹೊರತು
ಯಾರೂ ಏನೂ ಮಾತಾಡಲಿಲ್ಲ
ಸಮರ್ಥನೆ ಕೊಡಲು ಕವಿಗೆ ಉಸಿರಿಲ್ಲ
ಕವಿಯ ತುಡಿತ ಬಾಳ ಬಂಡಿಯ ಏರಿಳಿತ
ಬೇಕಿಲ್ಲ ಯಾರಿಗೂ ತಲ್ಲಣಗಳ ಹಿಂದಿನ ಕಾರಣ
ಎಷ್ಟೊಂದು ಅವಮಾನ ಕಡುಕಷ್ಟದ ಜೀವನ
ಬಾಳೆಂಬ ತೂತು ದೋಣಿಯ ಪಯಣ
ದಡ ಸೇರಲಿಲ್ಲ ಗುರಿ ಮುಟ್ಟಲಿಲ್ಲ
ನಟ್ಟ ನಡುವೆ ನಾವು ಮುಳುಗಿದರೆ
ದೂರುವವರ ನಡುವೆ ಮೇಲೆತ್ತುವವರಿಲ್ಲ
ಸತ್ತ ಕವಿಯ ಕತ್ತಲ ಬದುಕಿನ ಸುತ್ತ
ಕಥೆ ಸುತ್ತಿ ಬೆತ್ತಲಾಗಿಸುವ ಸಜ್ಜನರಿಗೆ
ಕವಿ ಗೊತ್ತಿದ್ದರೂ ಆತನ ಕವಿತೆ ಗೊತ್ತಿಲ್ಲ
ಕಾವ್ಯ ಕಡಲಿನ ಆಳ ಅಗಲದೊಳಗೆ
ಮಡುಗಟ್ಟಿದ ಸೋಲು ಸಂಕಟ ಹತಾಶೆಗಳೆಲ್ಲ
ಅರ್ಥವಾಗದ ವ್ಯರ್ಥ ಆಲಾಪ ಅರಸಿಕರಿಗೆ
ಹುಚ್ಚು ಕವಿಯ ಬೆಚ್ಚಿಬೀಳಿಸುವ ಬೆಂಕಿ ಕವಿತೆ
ಮೆಚ್ಚಿದವರಿಗೂ ಬೆಳಕ ಬೆನ್ನಿನ ಕತ್ತಲೆಯ ಚಿಂತೆ
ಕಾವ್ಯದ ತುಡಿತ ಬಿಟ್ಟು ಕುಡಿತದ ಗುಟ್ಟು
ಬಿಡಿಸುವುದರಲ್ಲಿ ನಿರತವಾಗಿದೆ ಜನರ ಸಂತೆ
ಕವಿತೆಯ ದೀಪ ಹದವಾಗಿ ಬೆಳಗಿದರೇನು
ಕವಿಯ ಬಾಳ ಬತ್ತಿ ನಿತ್ಯ ಉರಿದುರಿದು ಆರಿದಾಗ
ಬೆಳಕಿನ ಅಂದ ಚೆಂದ ಬಂಧಗಳ ಬದಿಗಿಟ್ಟು
ಹಣತೆಗೆ ಹಾಕಿದ್ದು ಎಣ್ಣೆಯೋ ಹೆಂಡವೋ
ಎನ್ನುವ ಕುಹಕದ ಮಾತು ಅತಿಯಾಗಿ
ಕವಿತೆಗಳೆಲ್ಲ ಕುರುಡು ಕವಿ ನಿರ್ಜೀವ ಕೊರಡು
– ಶಶಿಕಾಂತ ಯಡಹಳ್ಳಿ
22-05-2024
(ಯುವ ಕವಿಮಿತ್ರ ಲಕ್ಕೂರು ಆನಂದನ ಅಕಾಲಿಕ ಅಂತ್ಯದ ನಂತರ ಆತನ ಕಾವ್ಯ ಬಿಟ್ಟು ಕುಡಿತದ ಕುರಿತು ಮಾತುಕತೆ ಅತಿಯಾದಾಗ ಹುಟ್ಟಿದ್ದು ಈ ಕವಿತೆ)
