ಈಶಾನ್ಯ ಜಪಾನ್‌ ನಲ್ಲಿ ಮತ್ತೊಂದು ಭೂಕಂಪ

ಸುನಾಮಿ ಎಚ್ಚರಿಕೆ ವಾಪಸ್

ಟೋಕಿಯೋ: ಜಪಾನ್‌ನ ಈಶಾನ್ಯ ಕರಾವಳಿಯಲ್ಲಿ ಇಂದು ಸಂಭವಿಸಿದ ಭೂಕಂಪದ ನಂತರ ಹೊರಡಿಸಲಾಗಿದ್ದ ಸುನಾಮಿ ಎಚ್ಚರಿಕೆಯನ್ನು ಜಪಾನ್ ಹವಾಮಾನ ಇಲಾಖೆ (JMA) ರದ್ದುಗೊಳಿಸಿದೆ.

• ಬೆಂಗಳೂರಿನಲ್ಲಿ ಕನ್ನಡ ಗಜಲ್ ಯಾತ್ರೆ 100ರ ಸಂಭ್ರಮ
• ನಕಲಿ ದೇಶಪ್ರೇಮಿಗಳ ಆಟ ಇನ್ನೂ ರಾಜ್ಯದಲ್ಲಿ ನಡೆಯಲ್ಲ: ಬಿ ಕೆ ಹರಿಪ್ರಸಾದ್
• ಕಾಂಗ್ರೆಸ್ ಪಕ್ಷಕ್ಕೆ ತಕ್ಕ ಪಾಠ ಕಲಿಸುವುದು ನೂರು ಪರ್ಸೆಂಟ್ ಗ್ಯಾರೆಂಟಿ: ಆರ್ ಅಶೋಕ್
• ದರ್ಶನ್ ಪುಟ್ಟಣ್ಣಯ್ಯ ಅವರಿಗೆ ಸಚಿವ ಸ್ಥಾನ ನೀಡಿ
• ರಾಜಕೀಯ ಸಂತ ಶಾಂತವೇರಿ ಗೋಪಾಲಗೌಡ ಕೃತಿ ಲೋಕಾರ್ಪಣೆ

ಇಂದು (ಶುಕ್ರವಾರ) ಬೆಳಗ್ಗೆ 11:44ಕ್ಕೆ (ಸ್ಥಳೀಯ ಸಮಯ) ಅವೊಮೊರಿ ಪ್ರಿಫೆಕ್ಚರ್‌ನ ಕರಾವಳಿ ಹೊರಗೆ 6.7 ತೀವ್ರತೆಯ ಭೂಕಂಪ ಸಂಭವಿಸಿದೆ. ಭೂಮಿಯಿಂದ ಕೇವಲ 20 ಕಿ.ಮೀ. ಆಳದಲ್ಲಿ ಈ ಕಂಪನ ಉಂಟಾಗಿದೆ ಎಂದು JMA ತಿಳಿಸಿದೆ.

ಭೂಕಂಪದ ನಂತರ ಹೊಕ್ಕೈಡೋ ದ್ವೀಪದ ಎರಿಮೊ ಪಟ್ಟಣದಲ್ಲಿ 20 ಸೆಂ.ಮೀ. ಎತ್ತರದ ಎರಡು ಸುನಾಮಿ ಅಲೆಗಳು ಕಂಡುಬಂದವು ಮತ್ತು ಮೂರು ನಿಮಿಷಗಳ ನಂತರ ಅವೊಮೊರಿ ಪ್ರದೇಶದಲ್ಲೂ ಇದೇ ರೀತಿಯ ಅಲೆಗಳು ದಾಖಲಾಗಿವೆ. ಆದರೆ ಬಂದರುಗಳಲ್ಲಿ ಯಾವುದೇ ಗಮನಾರ್ಹ ಬದಲಾವಣೆ ಕಂಡುಬಂದಿಲ್ಲ ಎಂದು ಸ್ಥಳೀಯ ಸುದ್ದಿಸಂಸ್ಥೆಗಳು ವರದಿ ಮಾಡಿವೆ.

ಇನ್ನು ಜಪಾನ್‌ನ ಅಣು ನಿಯಂತ್ರಣ ಪ್ರಾಧಿಕಾರವು ಪ್ರದೇಶದ ಅಣು ಸ್ಥಾವರಗಳಲ್ಲಿ ಯಾವುದೇ ಅಸಹಜತೆ ಕಂಡುಬಂದಿಲ್ಲ ಎಂದು ಘೋಷಿಸಿದೆ. ಸೋಮವಾರ ಇದೇ ಪ್ರದೇಶದಲ್ಲಿ ಸಂಭವಿಸಿದ 7.5 ತೀವ್ರತೆಯ ದೊಡ್ಡ ಭೂಕಂಪಕ್ಕೆ ಹೋಲಿಸಿದರೆ ಇಂದಿನ ಕಂಪನದ ತೀವ್ರತೆ ಕಡಿಮೆಯಾಗಿದೆ. ಸೋಮವಾರದ ಭೂಕಂಪದಿಂದ ಕನಿಷ್ಠ 50 ಜನ ಗಾಯಗೊಂಡಿದ್ದರು ಮತ್ತು ರಸ್ತೆಗಳು, ಕಿಟಕಿಗಳು ಒಡೆದು, 70 ಸೆಂ.ಮೀ.ವರೆಗೆ ಸುನಾಮಿ ಅಲೆಗಳು ಅಪ್ಪಳಿಸಿದ್ದವು.

2011ರಲ್ಲಿ ಸಂಭವಿಸಿದ 9.0 ತೀವ್ರತೆಯ ಭಯಾನಕ ಭೂಕಂಪ ಮತ್ತು ಸುನಾಮಿಯಿಂದ ಸುಮಾರು 18,500 ಜನ ಸಾವು ಅಥವಾ ನಾಪತ್ತೆಯಾಗಿದ್ದ ನೆನಪು ಈ ಪ್ರದೇಶದ ಜನರನ್ನು ಇನ್ನೂ ಕಾಡುತ್ತಿದೆ.

2024ರಲ್ಲಿ ಮೊದಲ ಬಾರಿಗೆ JMA ದಕ್ಷಿಣ ಜಪಾನ್‌ನ ಪೆಸಿಫಿಕ್ ಕರಾವಳಿಗೆ “ತೀವ್ರ ಭೂಕಂಪ” ಸಾಧ್ಯತೆಯ ಬಗ್ಗೆ ವಿಶೇಷ ಎಚ್ಚರಿಕೆ ನೀಡಿತ್ತು. ನಾನ್‌ಕೈ ತ್ರೊಯಿನಲ್ಲಿ ಭಾರೀ ಭೂಕಂಪ ಸಂಭವಿಸಿದರೆ 2.98 ಲಕ್ಷ ಜನ ಸಾವಿಗೀಡಾಗಬಹುದು, ಸುಮಾರು 2 ಟ್ರಿಲಿಯನ್ ಡಾಲರ್ ನಷ್ಟವಾಗಬಹುದು ಎಂದು ಸರ್ಕಾರ ಅಂದಾಜಿಸಿದೆ.

ತೀವ್ರ ಭೂಕಂಪ ಆತಂಕದ ನಡುವೆಯೂ ಈಶಾನ್ಯ ಜಪಾನ್‌ನ ಜನ ದೀಪಗಳು, ನೀರು ಸಂಗ್ರಹ ಟ್ಯಾಂಕ್‌ಗಳು, ಪೀಠೋಪಕರಣಗಳು ಕುಸಿಯದಂತೆ ತಡೆಯುವ ಕೋಲುಗಳಂತಹ ವಿಪತ್ತು ಸಾಮಗ್ರಿಗಳನ್ನು ದಾಸ್ತಾನು ಮಾಡಿಕೊಳ್ಳುತ್ತಿದ್ದಾರೆ. ಹೊಕ್ಕೈಡೋದ ಹಕೊಡಾತೆ ನಗರದ ಒಂದು ಅಂಗಡಿಯಲ್ಲಿ ಸೋಮವಾರದ ಭೂಕಂಪದ ನಂತರ ಬಾಟಲಿ ನೀರು ಮತ್ತು ವಿಪತ್ತು ಕಿಟ್‌ಗಳ ಮಾರಾಟ ಮೂರು ಪಟ್ಟು ಹೆಚ್ಚಾಗಿದೆ ಎಂದು ಸುದ್ದಿಸಂಸ್ಥೆಗಳು ವರದಿ ಮಾಡಿವೆ.

ಭೂಕಂಪದ ವಿರುದ್ಧ ಸಿದ್ಧತೆ ನಡೆಸಿರುವ ಇಲ್ಲಿನ ನಾಗರಿಕರು, ಭೂಕಂಪ ಎದುರಿಸಲು ಕುಟುಂಬದ ಎಲ್ಲರಿಗೂ ವಿಪತ್ತು ಕಿಟ್ ಖರೀದಿಸುತ್ತಿರುವ ದೃಶ್ಯಗಳು ಕಂಡುಬಂದಿವೆ. 

ಪೆಸಿಫಿಕ್ “ರಿಂಗ್ ಆಫ್ ಫೈರ್”ನ ಪಶ್ಚಿಮ ಅಂಚಿನಲ್ಲಿ ನಾಲ್ಕು ದೊಡ್ಡ ಟೆಕ್ಟಾನಿಕ್ ಪ್ಲೇಟ್‌ಗಳ ಮೇಲೆ ನೆಲೆಗೊಂಡಿರುವ ಜಪಾನ್ ವಿಶ್ವದ ಅತ್ಯಂತ ಭೂಕಂಪ ಸಕ್ರಿಯ ದೇಶಗಳಲ್ಲಿ ಒಂದಾಗಿದೆ. ಇಲ್ಲಿ ವರ್ಷಕ್ಕೆ ಸರಾಸರಿ 1,500 ಭೂಕಂಪಗಳು ಸಂಭವಿಸುತ್ತವೆ ಎಂದು ಅಂದಾಜಿಸಲಾಗಿದೆ.