ವಿಧಾನಪರಿಷತ್ತಿಗೆ ಈಗ ಬೇಕಿರುವುದು ಬರಗೂರು

ಮಾನ್ಯ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಕೆ.ಪಿ.ಸಿ.ಸಿ. ಅಧ್ಯಕ್ಷರೂ ಆಗಿರುವ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರೇ, ವಿಧಾನ ಪರಿಷತ್ತಿಗೆ ಇನ್ನೂ ನಾಮಕರಣ ಪ್ರಕ್ರಿಯೆ ಮುಗಿದಿಲ್ಲವಾದರೆ ನೀವು ತಕ್ಷಣಕ್ಕೆ ಗಮನಿಸಬೇಕಾದ ಹೆಸರು ಕನ್ನಡನಾಡಿನ ಪ್ರಖರ ಚಿಂತಕ, ಮಹತ್ವದ ಸಾಹಿತಿ, ಚಲನಚಿತ್ರ ನಿರ್ದೇಶಕ ಬರಗೂರು ರಾಮಚಂದ್ರಪ್ಪ.

• ಮಹಿಳೆಯರಿಗೆ ಶೇ.33ರಷ್ಟು ಮೀಸಲಾತಿ ಮಸೂದೆ ಅಂಗೀಕಾರವಾಗಿದೆ
• ಮಹಿಳಾ ಮೀಸಲಾತಿ ವಿಷಯದಲ್ಲಿ ಮೋದಿ ಸರ್ಕಾರದಿಂದ ಮಹಿಳೆಯರಿಗೆ ದ್ರೋಹ: ಸಿದ್ದರಾಮಯ್ಯ
• ಕಾಂಗ್ರೆಸ್‌ಗೆ ಮಹಿಳಾ ಮೀಸಲಾತಿ ಬೇಕಿಲ್ಲ ಎಂಬುದು ಸ್ಪಷ್ಟ: ಬಸವರಾಜ ಬೊಮ್ಮಾಯಿ
• ಸಾರ್ವಜನಿಕ ಆರೋಗ್ಯ ವ್ಯವಸ್ಥೆ ಎಷ್ಟು ಹದಗೆಟ್ಟಿದೆ ಎನ್ನುವುದಕ್ಕೆ ಕನ್ನಡಿ: ಆರ್ ಅಶೋಕ್
• ನಮ್ಮ ಪ್ರತಿಭೆಗಳು ದೆಹಲಿಯಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತಿರುವುದು ಸಂತಸದ ವಿಷಯ: ಕೆ.ಸುಧಾಕರ್

ಮನುಷ್ಯರ ನಡುವೆ ಪ್ರೀತಿ ಬೆಸೆಯುವ, ಧರ್ಮಗಳ ನಡುವೆ ಸಾಮರಸ್ಯ ಮೂಡಿಸುವ, ಅಪ್ಪಟ ಜಾತ್ಯತೀತ ಪ್ರಗತಿಪರ ವ್ಯಕ್ತಿ ಬರಗೂರು. ಇವರು ಬಡಬಡಿಕೆಯ, ಗದ್ದಲ, ಗೊಂದಲ ಎಬ್ಬಿಸುವ ಹುಸಿ ಕ್ರಾಂತಿಕಾರಿಯಲ್ಲ ಎಂಬುದು ಇಡೀ ನಾಡಿಗೇ ಗೊತ್ತು.

ನಿಖರವಾಗಿ, ಗುರಿ ತಪ್ಪದಂತೆ ಮಾತನಾಡುವ ಪ್ರಬುದ್ಧ ಮತ್ತು ಜವಾಬ್ದಾರಿಯುತ ನಾಗರಿಕ, ಘನತೆ ಕಾಪಾಡಿಕೊಂಡಿರುವ ಅಪ್ಪಟ ಮನುಷ್ಯ. ನಾನು ಅವರನ್ನು ಅರವತ್ತೈದರ ಆಸುಪಾಸಿನವರು ಅಂದುಕೊಂಡಿದ್ದೆ. ನಂತರ‌ ಗೊತ್ತಾದದ್ದು ಅವರಿಗೆ 78 ವರ್ಷ. ವಯಸ್ಸು ಕೇವಲ ಸಂಖ್ಯೆ ಎನ್ನುವುದು ಬರಗೂರು ಅವರನ್ನು ನೋಡಿದರೇ ಗೊತ್ತಾಗುತ್ತದೆ.

ಮುಖ್ಯಮಂತ್ರಿಯಾದ ನಿಮಗೂ 76 ವರ್ಷ. ಇವತ್ತಿಗೂ ಕ್ರಿಯಾಶೀಲರಾಗಿ ಜನಪರ ಸಭೆ, ಸಮಾರಂಭಗಳಲ್ಲಿ ಭಾಗವಹಿಸುತ್ತಾ ಜನಜಾಗೃತಿ ಮೂಡಿಸುತ್ತಿರುವ ಬರಗೂರು ವಿಧಾನ ಪರಿಷತ್ತಿಗೆ ಗೌರವ ತರಬಲ್ಲರು.

ಈ‌ ನಾಡಿನ ವರ್ತಮಾನದ ಅಪರೂಪದ ಚೇತನವಾಗಿರುವ ಬರಗೂರು ಸರ್ಕಾರಕ್ಕೂ ಮಾರ್ಗದರ್ಶನ ನೀಡಬಲ್ಲರು, ಅಪ್ರಬುದ್ಧ ಬಿಜೆಪಿಗಳಿಗೂ ಮನುಷ್ಯತ್ವದ ಪಾಠ ಕಲಿಸಬಲ್ಲರು. ಅವರ‌ ಮಾತಿಗೆ ಅಂಥ ಶಕ್ತಿ ಇದೆ. ಅವರಿಗೆ ಇದರಲ್ಲಿ ಆಸಕ್ತಿ ಇದೆಯೋ ಇಲ್ಲವೋ ನನಗೆ ಗೊತ್ತಿಲ್ಲ. ಆದರೆ ಅವರು ಕನ್ನಡದ ನಿಜವಾದ ಸಾಂಸ್ಕೃತಿಕ ಪ್ರತಿನಿಧಿ. ಅವರ ಪ್ರತಿಭೆ‌ ಮತ್ತು ಜನಪರ ಕಾಳಜಿಯೇ ಅವರ ಬಂಡವಾಳ.

ಬರಗೂರು ಅವರನ್ನು ನಾಮಕರಣ ಮಾಡಿದರೆ ನಿಮ್ಮ ಸರ್ಕಾರಕ್ಕೂ ಇನ್ನಷ್ಟು ಗೌರವ ಬರುತ್ತದೆ. ಈ ಬಗ್ಗೆ ಚಿಂತಿಸಿ ಸಕಾರಾತ್ಮಕವಾಗಿ ನಿರ್ಧರಿಸುವಿರೆಂಬ ನಂಬಿಕೆ ನನಗಿದೆ.
ನಿಮ್ಮ

– ಟಿ.ಕೆ.ತ್ಯಾಗರಾಜ್, ಹಿರಿಯ ಪತ್ರಕರ್ತರು