ಹಿಂದಿ ಮೂಲ: ಪ್ರೊ.ರಾಮ್ ಪುನಿಯಾನಿ
ಕನ್ನಡಕ್ಕೆ: ಡಾ.ಪ್ರದೀಪ್‌ ಮಾಲ್ಗುಡಿ
ಇಂದಿನ ಕಾಲಘಟ್ಟದಲ್ಲಿ ರಾಜಕೀಯ ಪ್ರಚಾರದ (ಪ್ರೊಪಗಾಂಡಾ) ಮೂಲಕ ಸಮಾಜದ ದೃಷ್ಟಿಕೋನವನ್ನು ಪ್ರಭಾವಿಸುವ ಹಲವು ಉದಾಹರಣೆಗಳು ನಮ್ಮ ಕಣ್ಮುಂದಿವೆ. ಆಹಾರ ಪದ್ಧತಿಯೂ ಸಹ ವಿಭಜಕ ರಾಜಕೀಯ ಪ್ರವೃತ್ತಿಗಳ ಕೈಯಲ್ಲಿ ಒಂದು ಅಸ್ತ್ರವಾಗಿ ಮಾರ್ಪಾಡಾಗಿದೆ. ಮುಸ್ಲಿಮರು ಮಾಂಸಾಹಾರಿಗಳಾಗಿರುವುದರಿಂದಲೇ ಹೆಚ್ಚು ಹಿಂಸಾತ್ಮಕರಾಗಿರುತ್ತಾರೆ ಎಂಬ ವಾದವನ್ನು ಮಂಡಿಸಲಾಗುತ್ತದೆ. ಪವಿತ್ರ ಹಸು ಮತ್ತು ಗೋಮಾಂಸ ಸೇವನೆಯನ್ನೂ ಇದಕ್ಕೆ ತಳಕುಹಾಕಲಾಯಿತು; ಇದರ ಪರಿಣಾಮದಿಂದ ಭಾರತದಲ್ಲಿ ಗುಂಪು ಹಲ್ಲೆಗಳು (ಲಿಂಚಿಂಗ್) ಆರಂಭವಾಗುವುದಕ್ಕೆ ನಾವು ಸಾಕ್ಷಿಯಾದೆವು. ಇವುಗಳಿಗೆ ಮುಖ್ಯವಾಗಿ ಮುಸ್ಲಿಮರು ಬಲಿಯಾದರೆ, ಜೊತೆಗೆ ದೊಡ್ಡ ಸಂಖ್ಯೆಯಲ್ಲಿ ದಲಿತರೂ ಸಹ ಇದರ ಪರಿಣಾಮವನ್ನು ಎದುರಿಸಬೇಕಾಯಿತು. ವಸತಿ ಸಮುಚ್ಚಯಗಳಲ್ಲಿ (ಹೌಸಿಂಗ್ ಸೊಸೈಟಿ) ಯಾರು ವಾಸಿಸಬೇಕು ಮತ್ತು ಯಾರು ವಾಸಿಸಬಾರದು ಎಂಬುದನ್ನೂ ಆಹಾರ ಪದ್ಧತಿಯ ಆಧಾರದ ಮೇಲೆಯೇ ನಿರ್ಧರಿಸಲಾಗುತ್ತಿದೆ. ಫ್ಲಾಟ್ ಮಾರಾಟಕ್ಕೆ ಅನುಮತಿ ನೀಡುವ ಮುನ್ನ ಹೌಸಿಂಗ್ ಸೊಸೈಟಿಗಳು ಖರೀದಿದಾರರ ಆಹಾರ ಪದ್ಧತಿಯ ಬಗ್ಗೆ ವಿಚಾರಿಸುತ್ತಿವೆ. ಈ ವಿಷಯ ಇತ್ತೀಚೆಗೆ ಬಂಗಾಳದಲ್ಲಿ ಹೆಚ್ಚು ಸಂಕೀರ್ಣ ರೂಪದಲ್ಲಿ ಮುನ್ನೆಲೆಗೆ ಬಂದಿತು; ಅಲ್ಲಿ ಪೂಜಾ-ಪೆಂಡಾಲ್‌ಗಳ ಸುತ್ತಮುತ್ತ ಮಾಂಸಾಹಾರ ಪದಾರ್ಥಗಳನ್ನು ಇಡದಂತೆ ಸಲಹೆ ನೀಡಲಾಯಿತು. ಅದೇ ವೇಳೆ, ಸಮಾಜದ ಒಂದು ವರ್ಗ ಜೈನ ಧರ್ಮದ ಪರ್ಯೂಷಣ ಪರ್ವದ (ಪರ್ಯೂಷಣ ಪರ್ವ ಎಂದರೆ ಜೈನ ಧರ್ಮದ ಅತ್ಯಂತ ಪವಿತ್ರ ಮತ್ತು ಪ್ರಮುಖ ಹಬ್ಬ. ‘ಪರ್ಯೂಷಣ’ ಎಂದರೆ ‘ಹತ್ತಿರ ಬರುವುದು’ ಅಥವಾ ‘ಆತ್ಮದ ಹತ್ತಿರ ಲೀನವಾಗುವುದು’. ಈ ಸಮಯದಲ್ಲಿ ಜೈನರು ತಮ್ಮ ದೈನಂದಿನ ಲೌಕಿಕ ಕೆಲಸಗಳಿಂದ ದೂರವಿದ್ದು, ಆಧ್ಯಾತ್ಮಿಕ ಸಾಧನೆ, ಜಪ, ತಪಸ್ಸು ಮತ್ತು ಆತ್ಮಾವಲೋಕನದಲ್ಲಿ ತೊಡಗುತ್ತಾರೆ.) ಸಂದರ್ಭದಲ್ಲಿ ಮಾಂಸಾಹಾರದ ಮೇಲೆ ನಿಷೇಧ ಹೇರಬೇಕೆಂದು ಒತ್ತಾಯಿಸುತ್ತಿದೆ.
- ದುರುದ್ದೇಶಪೂರ್ವಕ Form-7 ಸಲ್ಲಿಕೆ ಕುರಿತು SIT ತನಿಖೆ ನಡೆಸಿ
- ಆಹಾರದ ಮೇಲೆ ರಾಜಕೀಯ
- ಕಾಲದ ಹೆಜ್ಜೆಯ ಸದ್ದು: ಕೋಲ್ಸ್ ಪಾರ್ಕ್‌ನ ಶತಮಾನದ ಕಥೆ
- ದ್ವೇಷರಹಿತ ರಾಜಕಾರಣದ ಪ್ರತೀಕ ಜೆ ಹೆಚ್ ಪಟೇಲ್
- ಅಭಿವೃದ್ಧಿ ಕಾಮಗಾರಿಗಳಿಗೆ ವೇಗ ನೀಡಿ, ತುರ್ತು ಸಮಸ್ಯೆಗಳಿಗೆ ತಕ್ಷಣ ಪರಿಹಾರ ಕಲ್ಪಿಸಿ: ಕೃಷ್ಣ ಬೈರೇಗೌಡ
ಧೀರೇಂದ್ರ ಕೃಷ್ಣ ಶಾಸ್ತ್ರಿ (ಚೀಟಿ ಬರೆದು ಭವಿಷ್ಯ ಹೇಳುವ ಬಾಬಾ. ಪ್ರಧಾನಿ ಇವರನ್ನು ತಮ್ಮ ಕಿರಿಯ ಸಹೋದರ ಎಂದು ಕರೆಯುತ್ತಾರೆ) ದುರ್ಗಾಪೂಜೆಯಲ್ಲಿ ಮಾಂಸಾಹಾರ ನಿಷೇಧಿಸಬೇಕೆಂದು ನೀಡಿದ ಸಲಹೆಗೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಯಿತು. ಇನ್ನು ಕೆಲವೇ ದಿನಗಳಲ್ಲಿ ಬಂಗಾಳದ ಅತಿ ದೊಡ್ಡ ಹಬ್ಬವಾದ ದುರ್ಗಾಪೂಜೆ ಪ್ರಾರಂಭವಾಗಲಿದೆ. ಬಿಜೆಪಿ ಇತ್ತೀಚೆಗೆ ಪಶ್ಚಿಮ ಬಂಗಾಳದಲ್ಲಿ ಅಧಿಕಾರಕ್ಕೆ ಬಂದಿದೆ. ಬಂಗಾಳದಲ್ಲಿ ಬಿಜೆಪಿಯ ರಾಜಕೀಯ ಶಕ್ತಿ ಹೆಚ್ಚಾಗುತ್ತಿದ್ದಂತೆ, ಅಲ್ಲಿ ಶ್ರೀರಾಮನನ್ನು ಮುನ್ನೆಲೆಗೆ ತರುವ ಪ್ರಕ್ರಿಯೆಯೂ ಆರಂಭವಾಯಿತು. ಬಿಜೆಪಿ ಮತ್ತು ಅದರ ಬೆಂಬಲಿಗರು ಶ್ರೀರಾಮ-ಕೇಂದ್ರಿತ ಉತ್ಸವಗಳಿಗೆ ಉತ್ತೇಜನ ನೀಡುತ್ತಿದ್ದಾರೆ. ರಾಮನ ಹೆಸರನ್ನು ಆಶ್ರಯಿಸಿದ್ದು ಉತ್ತರ ಭಾರತದಲ್ಲಿ ಬಿಜೆಪಿಗೆ ಭಾರಿ ಚುನಾವಣಾ ಲಾಭ ತಂದುಕೊಟ್ಟಿತು ಮತ್ತು ಇದರ ಪ್ರಭಾವ ಇಡೀ ದೇಶದ ಚುನಾವಣಾ ಚಿತ್ರಣದ ಮೇಲಾಯಿತು.
ಬಂಗಾಳದಲ್ಲಿ ಅಧಿಕಾರ ವಹಿಸಿಕೊಂಡ ನಂತರ ಬಿಜೆಪಿ ಬಾಗೇಶ್ವರ ಧಾಮದ ಧೀರೇಂದ್ರ ಶಾಸ್ತ್ರಿ ಅವರನ್ನು ಬಂಗಾಳಕ್ಕೆ ಆಹ್ವಾನಿಸಿತು. ಅವರು ಹೌರಾದ ಲಿಲುವಾಹ್‌ನಲ್ಲಿ ಹನುಮಾನ್ ಕಥೆ ಹೇಳಲು ಬಂದಿದ್ದರು. ಪೂಜೆಯ ಸಮಯದಲ್ಲಿ ಮಾಂಸಾಹಾರ ಪದಾರ್ಥಗಳನ್ನು ದುರ್ಗಾ ದೇವಿಯ ಮೂರ್ತಿಯಿಂದ ದೂರವಿಡಬೇಕು ಎಂದು ಅವರು ಜನರಿಗೆ ಸಲಹೆ ನೀಡಿದರು. ಇದೇ ರೀತಿಯ ಸಲಹೆಯನ್ನು ಆರೆಸ್ಸೆಸ್‌ನ ಅಂಗಸಂಸ್ಥೆಯಾದ ವಿಎಚ್‌ಪಿ ಕೆಲವು ದಿನಗಳ ಹಿಂದಷ್ಟೇ ನೀಡಿತ್ತು. ಇದರಿಂದ ಬಂಗಾಳಿ ಹಿಂದೂಗಳು ಆಕ್ರೋಶಗೊಂಡರು. ತಮ್ಮನ್ನು ‘ಹಿಂದೂ ರಾಷ್ಟ್ರವಾದಿ’ಗಳು ಎಂದು ಕರೆದುಕೊಳ್ಳುವ ಹಿಂದೂಗಳೂ ಈ ವಿರೋಧದಲ್ಲಿ ಸೇರಿದ್ದರು. ಹಲವು ಪ್ರಮುಖ ಬಂಗಾಳಿಗಳು ತಮ್ಮ ವಿರೋಧ ವ್ಯಕ್ತಪಡಿಸಿ, “ನಾವು ದುರ್ಗಾಪೂಜೆಯನ್ನು ಹೇಗೆ ಆಚರಿಸಬೇಕು, ಏನನ್ನು ತಿನ್ನಬೇಕು ಮತ್ತು ಏನನ್ನು ತಿನ್ನಬಾರದು ಎಂದು ಶಾಸ್ತ್ರಿ ನಮಗೆ ಕಲಿಸಲು ಬರಬೇಕಿಲ್ಲ” ಎಂಬ ಹೇಳಿಕೆ ನೀಡಿದರು.
ಈ ಪ್ರತಿಕ್ರಿಯೆಗೆ ಕಾರಣವೇನೆಂದರೆ, ಮೀನು ಮತ್ತು ಮೇಕೆ ಮಾಂಸದಿಂದ ಮಾಡುವ ಅಡುಗೆಗಳು ದುರ್ಗಾ ಉತ್ಸವದ ಬಹುತೇಕ ಅನಿವಾರ್ಯ ಭಾಗವಾಗಿವೆ. ಬಂಗಾಳಿ ಸಂಸ್ಕೃತಿಯಲ್ಲಿ ಮೀನಿಗೆ ಅತ್ಯಂತ ಮಹತ್ವದ ಸ್ಥಾನವಿದೆ ಮತ್ತು ಹಿಂದೂ ಧರ್ಮದ ಅನೇಕ ಧಾರ್ಮಿಕ ವಿಧಿವಿಧಾನಗಳಲ್ಲಿ ಮಾಂಸಾಹಾರ ಒಂದು ಭಾಗವಾಗಿದೆ ಎಂದು ಹಲವರು ಗಮನಸೆಳೆದರು. ತ್ರಿಪುರಾದ ಮಾಜಿ ರಾಜ್ಯಪಾಲ ತಥಾಗತ ರಾಯ್ ಅವರಿಂದ ಹಿಡಿದು ಹಲವು ಪತ್ರಕರ್ತರು, ಕಂಟೆಂಟ್ ಕ್ರಿಯೇಟರ್‌ಗಳು ಮತ್ತು ತಮ್ಮನ್ನು “ಬಂಗಾಳಿ ಹಿಂದೂ ರಾಷ್ಟ್ರವಾದಿಗಳು” ಎಂದು ಕರೆದುಕೊಳ್ಳುವವರು ಸೇರಿದಂತೆ ಸಮಾಜದ ವಿವಿಧ ವರ್ಗಗಳ ಜನ ಇದರ ವಿರುದ್ಧ ಪ್ರತಿಭಟಿಸಿದರು. “ಬಂಗಾಳಿಗಳು ದುರ್ಗಾಪೂಜೆಯನ್ನು ಹೇಗೆ ಆಚರಿಸಬೇಕೆಂದು ಯಾರೂ ಹೇಳಿಕೊಡಬೇಕಿಲ್ಲ” ಎಂದು ಕೋಲ್ಕತ್ತಾದ ಕಂಟೆಂಟ್ ಕ್ರಿಯೇಟರ್ ಶ್ರೇಯಸಿ ವಿಶ್ವಾಸ್ ಬ್ಯಾನರ್ಜಿ ಫೇಸ್‌ಬುಕ್‌ನಲ್ಲಿ ಬರೆದರು. ಅವರು ಒಂದು ವಿಡಿಯೋವನ್ನೂ ಹಂಚಿಕೊಂಡಿದ್ದು, ಅದರಲ್ಲಿ ‘ಹೊರಗಿನ ವ್ಯಕ್ತಿಯೊಬ್ಬರು’ ಬಂಗಾಳಿಗಳ ವಿಶಿಷ್ಟ ಧಾರ್ಮಿಕ ಮತ್ತು ಪಾಕಶಾಸ್ತ್ರದ ಸಂಪ್ರದಾಯಗಳ ನಿಯಮಗಳನ್ನು ನಿರ್ಧರಿಸುತ್ತಿದ್ದಾರೆ ಎಂದರು. ಹಲವರು ಶಾಸ್ತ್ರಿಯವರ ಪೋಸ್ಟರ್‌ಗಳನ್ನು ಹರಿದು ವಿರೂಪಗೊಳಿಸಿದರು.
ಶಾಸ್ತ್ರಿ ಅವರನ್ನು ಅತ್ಯಂತ ಆತ್ಮೀಯವಾಗಿ ಸ್ವಾಗತಿಸಿದ್ದ ಸುವೇಂದು ಅಧಿಕಾರಿ, ಕೋಲ್ಕೊತ್ತಾದ ಕಾಳೀಘಾಟ್ ದೇವಾಲಯದಲ್ಲಿ ನಡೆದ ಸಮಾರಂಭವೊಂದರಲ್ಲಿ ಪಾಲ್ಗೊಂಡು ಪ್ರಸಾದದ ರೂಪದಲ್ಲಿ ಕರಿದ ಮೀನನ್ನು ಸೇವಿಸಿದರು. ಮೀನು ಬಂಗಾಳಿ ಸಂಸ್ಕೃತಿಯ ಕೇಂದ್ರಬಿಂದು ಎಂದು ಹಲವರು ಅಭಿಪ್ರಾಯಪಟ್ಟರು. ಆಹಾರ, ಉಡುಗೆ-ತೊಡುಗೆ, ಭಾಷೆ ಅಥವಾ ಧರ್ಮ ಹೀಗೆ ಎಲ್ಲ ದೃಷ್ಟಿಯಿಂದಲೂ ಭಾರತ ಅತ್ಯಂತ ವೈವಿಧ್ಯಮಯವಾಗಿದೆ. ಹಿಂದೂಗಳಲ್ಲಿ ಅನೇಕ ಪಂಥಗಳಿದ್ದು, ನಾನಾ ರೀತಿಯ ಆಹಾರ ಪದ್ಧತಿಗಳು ಮತ್ತು ಸಂಪ್ರದಾಯಗಳಿವೆ. ಮಟನ್ ಖಾದ್ಯಗಳು ಕಾಶ್ಮೀರಿ ಬ್ರಾಹ್ಮಣರ ಸಂಸ್ಕೃತಿಯ ಅವಿಭಾಜ್ಯ ಅಂಗವಾಗಿವೆ. ಆಹಾರ ಪದ್ಧತಿ ಹಲವು ಅಂಶಗಳಿಂದ ನಿರ್ಧಾರವಾಗುತ್ತದೆ. ಭೌಗೋಳಿಕ ಪರಿಸ್ಥಿತಿ ಅದಕ್ಕೆ ಮುಖ್ಯ ಆಧಾರವಾಗಿದೆ. ಕರಾವಳಿ ಪ್ರದೇಶಗಳಲ್ಲಿ ಸಮುದ್ರಾಹಾರ ದೈನಂದಿನ ಊಟದ ಪ್ರಮುಖ ಭಾಗವಾಗಿದೆ.
ಇತ್ತೀಚೆಗೆ ಮುಕ್ತಾಯಗೊಂಡ ಬ್ರಿಕ್ಸ್ (BRICS) ಶೃಂಗಸಭೆಯಲ್ಲಿ ಪ್ರಧಾನಿ ಆಯೋಜಿಸಿದ್ದ ರಾತ್ರಿ ಭೋಜನಕೂಟದಲ್ಲಿ ಸಂಪೂರ್ಣ ಸಸ್ಯಾಹಾರವನ್ನಷ್ಟೇ ಬಡಿಸಲಾಯಿತು. ಕಾಕತಾಳೀಯವಾಗಿ, ಕಾರಣ ಏನೇ ಇರಲಿ, ಷಿ ಜಿನ್‌ಪಿಂಗ್ ಈ ಭೋಜನಕೂಟದಲ್ಲಿ ಪಾಲ್ಗೊಳ್ಳಲಿಲ್ಲ. ಅಂತರರಾಷ್ಟ್ರೀಯ ಅತಿಥಿಗಳಿಗೆ ಕೇವಲ ಸಸ್ಯಾಹಾರವನ್ನು ಮಾತ್ರ ಒದಗಿಸಿದ್ದನ್ನು ವಿರೋಧ ಪಕ್ಷಗಳು ಟೀಕಿಸಿದರೆ, ಕಿರಣ್ ರಿಜಿಜು ಅವರು “ಅತಿಥಿಗಳು ಮೆನುವನ್ನು ಮೆಚ್ಚಿಕೊಂಡಿದ್ದಾರೆ” ಎಂದು ಸಮರ್ಥಿಸಿಕೊಂಡರು. ಇದರಿಂದಾಗಿ ಭಾರತ ಕೇವಲ ಸಸ್ಯಾಹಾರಿಗಳ ದೇಶ ಎಂಬ ಸರ್ಕಾರದ ನಿಲುವು ಸ್ಪಷ್ಟವಾಗಿ ಗೋಚರಿಸುತ್ತದೆ. ಉತ್ತರ ಪ್ರದೇಶದ ಮುಖ್ಯಮಂತ್ರಿ ಆದಿತ್ಯನಾಥ್ ಇತ್ತೀಚೆಗೆ ರಾಜ್ಯದ ಎಲ್ಲಾ ಜಿಲ್ಲೆಗಳ ಮುಖ್ಯ ತಿನಿಸುಗಳ ನಕ್ಷೆಯೊಂದನ್ನು ಪ್ರಕಟಿಸಿದರು. ಅದರಲ್ಲಿ ಲಕ್ನೋದ ಪ್ರಸಿದ್ಧ ‘ಟುಂಡೆ ಕಬಾಬ್’ ಬಗ್ಗೆ ಉಲ್ಲೇಖವೇ ಇರಲಿಲ್ಲ; ಇಡೀ ಉತ್ತರ ಪ್ರದೇಶವೇ ಸಂಪೂರ್ಣ ಸಸ್ಯಾಹಾರಿ ಎಂಬಂತೆ ಕೇವಲ ಸಸ್ಯಾಹಾರಿ ತಿನಿಸುಗಳನ್ನಷ್ಟೇ ಅದರಲ್ಲಿ ಸೇರಿಸಲಾಗಿತ್ತು.
ಮತ್ತೊಂದು ಘಟನೆ, ಗಂಗಾ ನದಿಯಲ್ಲಿ ದೋಣಿ ವಿಹಾರ ಮಾಡುತ್ತಾ ರಂಜಾನ್ ಇಫ್ತಾರ್ ವೇಳೆ ಚಿಕನ್ ಬಿರಿಯಾನಿ ತಿಂದಿದ್ದಕ್ಕಾಗಿ 14 ಮುಸ್ಲಿಮರನ್ನು ಗೃಹಬಂಧನದಲ್ಲಿ ಇರಿಸಲಾಯಿತು. ಈ ಘಟನೆಯ ಗಮನಾರ್ಹ ಅಂಶವೆಂದರೆ, ಅದೇ ಸಮಯದಲ್ಲಿ ಅಲ್ಲಿ ದೋಣಿ ವಿಹಾರ ಮಾಡುತ್ತಾ ಮದ್ಯಪಾನ ಮಾಡುತ್ತಿದ್ದ ಹಿಂದೂಗಳ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳಲಿಲ್ಲ. ಇದು ಬಿಜೆಪಿ ಸರ್ಕಾರಗಳ ನಡವಳಿಕೆ.
ಸುಮಾರು ಶೇಕಡಾ 70ರಷ್ಟು ಭಾರತೀಯರು ಮಾಂಸಾಹಾರಿಗಳಾಗಿದ್ದಾರೆ ಎಂದು ತಿಳಿದಿದ್ದರೂ, ಬಿಜೆಪಿ ಸರ್ಕಾರಗಳು ಸಸ್ಯಾಹಾರಕ್ಕೆ ಹೆಚ್ಚಿನ ಉತ್ತೇಜನ ನೀಡುತ್ತಿವೆ. ಈ ಅಭಿಯಾನ ಹಲವೆಡೆ ಯಶಸ್ವಿಯೂ ಆಗಿದೆ. ಕಳೆದ ಮೂರು ದಶಕಗಳಿಂದ ಬಿಜೆಪಿ ಆಡಳಿತದಲ್ಲಿರುವ ಗುಜರಾತ್‌ನಲ್ಲಿ ಮಾಂಸಾಹಾರ ಮಾರಾಟ ಮಾಡುವ ಅಂಗಡಿಗಳು ಮತ್ತು ಹೋಟೆಲ್‌ಗಳು ಬಹುತೇಕ ಕಣ್ಮರೆಯಾಗಿವೆ. ಅನೇಕ ಜನ ತಮ್ಮ ಮಾಂಸಾಹಾರದ ಬಯಕೆಯನ್ನು ತೀರಿಸಿಕೊಳ್ಳಲು ಗುಜರಾತ್ ಗಡಿಯಾಚೆಗಿನ ಹತ್ತಿರದ ಪ್ರದೇಶಗಳಿಗೆ ತೆರಳುತ್ತಾರೆ.
ಭಾರತೀಯರ ಪ್ರಸ್ತುತ ಆಹಾರ ಪದ್ಧತಿ ಮತ್ತು ತಮ್ಮ ಸಸ್ಯಾಹಾರ ಹೇರಿಕೆಯ ಕಾರ್ಯಸೂಚಿ (ಅಜೆಂಡಾ) ನಡುವೆ ಸಮತೋಲನ ಕಾಯ್ದುಕೊಳ್ಳುವುದು ಹೇಗೆಂಬುದೇ ಬಿಜೆಪಿಯ ಗೊಂದಲವಾಗಿದೆ. ಸಿಕ್ಕ ಪ್ರತಿಯೊಂದು ಅವಕಾಶದಲ್ಲೂ ಆ ಪಕ್ಷ ಮತ್ತು ಅದರ ಅಂಗಸಂಸ್ಥೆಗಳು ಸಸ್ಯಾಹಾರವನ್ನು ಪ್ರಚಾರ ಮಾಡಲು ಪ್ರಯತ್ನಿಸುತ್ತವೆ. ಯಾವುದೋ ಕಾರಣಕ್ಕೆ ಬಿಜೆಪಿ ಮಾಂಸಾಹಾರವನ್ನು ಮುಸ್ಲಿಮರೊಂದಿಗೆ ಜೋಡಿಸಿ ನೋಡುತ್ತದೆ. ವಾಸ್ತವವಾಗಿ ಮಾಂಸಾಹಾರ ಧರ್ಮದ ಗಡಿಗಳನ್ನು ಮೀರಿ ಭಾರತೀಯರ ಆಹಾರ ಪದ್ಧತಿಯ ಅವಿಭಾಜ್ಯ ಅಂಗವಾಗಿದೆ. ಗುಜರಾತ್‌ನಂತಹ ಸ್ಥಳಗಳಲ್ಲಿ ಅವರ ಈ ಆಕ್ರಮಣಕಾರಿ ಸಸ್ಯಾಹಾರವಾದ ನಡೆಯಬಹುದು, ಆದರೆ ಪಶ್ಚಿಮ ಬಂಗಾಳದಲ್ಲಿ ಅದು ತೀವ್ರ ವಿರೋಧ ಎದುರಿಸುತ್ತಿದೆ. ಕಳೆದ ಹಲವು ದಶಕಗಳಲ್ಲಿ ಅಣಬೆಗಳಂತೆ ಹುಟ್ಟಿಕೊಂಡಿರುವ ಶಾಸ್ತ್ರಿ ಮತ್ತು ಅವರಂತಹ ಇತರ ಬಾಬಾಗಳು ಸಹ ಆರೆಸ್ಸೆಸ್-ಬಿಜೆಪಿಯ ಈ ರಾಜಕೀಯದ ಧ್ವಜಧಾರಿಗಳಾಗಿದ್ದಾರೆ.
ಶಾಸ್ತ್ರಿ ಇದೇ ದಿಕ್ಕಿನಲ್ಲಿ ಪ್ರಯತ್ನಿಸುತ್ತಿದ್ದರು ಮತ್ತು ಒಂದು ನಿರ್ದಿಷ್ಟ ರೀತಿಯ ಆಹಾರ ಪದ್ಧತಿಗೆ ಉತ್ತೇಜನ ನೀಡುವುದು ಅವರ ಉದ್ದೇಶವಾಗಿತ್ತು. ಮಾನವ ಸಮಾಜ ವಿವಿಧ ಹಂತಗಳಲ್ಲಿ ವಿಕಸನಗೊಂಡಿದೆ ಮತ್ತು ಆಹಾರ ಪದ್ಧತಿಗಳು ಅತ್ಯಂತ ವೈವಿಧ್ಯಮಯವಾಗಿವೆ. ಬಿಜೆಪಿ-ಆರೆಸ್ಸೆಸ್ ಮತ್ತು ಅವರ ರಾಜಕೀಯ-ಸಾಂಸ್ಕೃತಿಕ ಬೆಂಬಲಿಗರು ಸಸ್ಯಾಹಾರವನ್ನು ವೈಭವೀಕರಿಸುವುದರ ಹಿಂದೆ ಸೈದ್ಧಾಂತಿಕ ಕಾರಣಗಳಿವೆ. ವೀಗನಿಸಂ (ವೀಗನಿಸಂ (Veganism) ಎಂದರೆ ಪ್ರಾಣಿಗಳಿಂದ ಸಿಗುವ ಯಾವುದೇ ಉತ್ಪನ್ನಗಳನ್ನು ಬಳಸದ ಜೀವನಶೈಲಿ ಅಥವಾ ತತ್ತ್ವ. ಕನ್ನಡದಲ್ಲಿ ಇದನ್ನು ಸಾಮಾನ್ಯವಾಗಿ ‘ಸಸ್ಯಹಾರಿ ಜೀವನಶೈಲಿ’ ಅಥವಾ ‘ಸಂಪೂರ್ಣ ಸಸ್ಯಹಾರ’ ಎನ್ನಬಹುದು.) ಅಥವಾ ಸಸ್ಯಾಹಾರವನ್ನು ಉತ್ತೇಜಿಸಲು ಬೇರೆ ಕಾರಣಗಳೂ ಇರಬಹುದು. ಆದರೆ ಜನರ ಆಹಾರ ಪದ್ಧತಿಯನ್ನು ಗೌರವಿಸುವುದು ಪ್ರಜಾಪ್ರಭುತ್ವ ಸಮಾಜದ ಅವಿಭಾಜ್ಯ ಅಂಗವಾಗಿರಬೇಕು. ಮಾಂಸಾಹಾರ ನಿಷೇಧಕ್ಕೆ ವಕಾಲತ್ತು ವಹಿಸಿದ್ದಕ್ಕಾಗಿ ಈ ಬಾಬಾ ತೀವ್ರ ಟೀಕೆಗಳನ್ನು ಎದುರಿಸಬೇಕಾಗಿದೆ. ‘ಮುಸ್ಲಿಂ ದ್ವೇಷ’ದ ತನ್ನ ಕಾರ್ಯಸೂಚಿಯನ್ನು ಮುಂದುವರಿಸಲು ನೆರವಾಗುವಂತೆ, ಬಿಜೆಪಿ ಬೇರೆ ಮಾರ್ಗಗಳನ್ನು ಕಂಡುಕೊಂಡು ತನ್ನ ಸಸ್ಯಾಹಾರವಾದಕ್ಕೆ ಅಂಟಿಕೊಳ್ಳಲು ಪ್ರಯತ್ನಿಸಬಹುದು!
