ಮಾಲ್ಗುಡಿ ಎಕ್ಸ್‌ಪ್ರೆಸ್ ಫ್ಯಾಕ್ಟ್ ಚೆಕ್
ಬೆಂಗಳೂರು: ದೇಶದ ರಾಜಕೀಯ ಮತ್ತು ಸಾಮಾಜಿಕ ವಿದ್ಯಮಾನಗಳ ವಿಶ್ಲೇಷಣೆ ಮೂಲಕ ಲಕ್ಷಾಂತರ ವೀಕ್ಷಕರನ್ನು ಹೊಂದಿರುವ ಪ್ರಸಿದ್ಧ ಯೂಟ್ಯೂಬರ್ ಧ್ರುವ್ ರಾಠಿ ಅವರ ಹೆಸರಿನ ಸುತ್ತ ಮತ್ತೊಮ್ಮೆ ನಕಲಿ ಸುದ್ದಿಯ ಕಾರ್ಮೋಡ ಆವರಿಸಿದೆ.
- ದೆಹಲಿ ದೌರ್ಜನ್ಯ ಖಂಡಿಸಿ ಬೆಂಗಳೂರಿನಲ್ಲಿ ಜಾಗೃತರ ಆಕ್ರೋಶ
- ಅಹರ್ನಿಶಿ ಪ್ರಕಾಶನದಿಂದ ‘ಮೂರು ಕಥಾ ಸಂಕಲನಗಳ ಬಿಡುಗಡೆ
- ಧ್ರುವ್ ರಾಠಿ ಮುಸ್ಲಿಮರೇ? ‘ಬಬ್ರುದ್ದಿನ್ ರಶೀದ್’ ಹೆಸರಿನ ಹಿಂದಿರುವ ಅಸಲಿಯತ್ತೇನು?
- ನಟರಾಜ್ ಹುಳಿಯಾರ್ ಅವರ ಡಾಕ್ಟರ್ ಸಾಹೇಬ್ – ರಾಮಮನೋಹರ ಲೋಹಿಯಾ ಜೀವನಯಾನ ಬಿಡುಗಡೆ
- ‘ಜೆನ್ ಜಿ’ ಹೆಸರಲ್ಲಿ ಪೋಸ್ಟ್ ಹಾಕಿ ತಗ್ಲಾಕೊಂಡ ಚಕ್ರವರ್ತಿ ಸೂಲಿಬೆಲೆ!
ಧ್ರುವ್ ರಾಠಿ ಅವರ ನಿಜವಾದ ಹೆಸರು ಹಿಂದೂ ಅಲ್ಲ, ಅವರ ಅಸಲಿ ಹೆಸರು “ಬಬ್ರುದ್ದಿನ್ ರಶೀದ್” ಎಂಬ ಒಕ್ಕಣೆಯ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗುತ್ತಿದ್ದು, ನೆಟ್ಟಿಗರಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಹಾಗಾದರೆ ವೈರಲ್ ಆಗುತ್ತಿರುವ ಈ ಪೋಸ್ಟ್‌ನಲ್ಲಿ ಹುರುಳಿದೆಯೇ? ‘ಮಾಲ್ಗುಡಿ ಎಕ್ಸ್‌ಪ್ರೆಸ್’ ನಡೆಸಿದ ಆಳವಾದ ತನಿಖೆಯಲ್ಲಿ ಬಯಲಾದ ಸತ್ಯಾಂಶ ಇಲ್ಲಿದೆ.
ವೈರಲ್ ಪೋಸ್ಟ್‌ನಲ್ಲೇನಿದೆ?: ಫೇಸ್‌ಬುಕ್‌ನಲ್ಲಿ ‘Mahesh Anna Telkar’ ಎಂಬ ಹೆಸರಿನ ಖಾತೆಯಿಂದ ಹಳದಿ ಹಿನ್ನೆಲೆಯ ಪೋಸ್ಟರ್ ಒಂದನ್ನು ಹಂಚಿಕೊಳ್ಳಲಾಗಿದೆ. ಅದರಲ್ಲಿ: “ಹೆಸರು ಮಾತ್ರ ಹಿಂದೂ ಧರ್ಮ ದ್ದೇ ಬೇಕು ನಿಮಗ” “ಧ್ರುವ್ ರಾಠಿ ನಿಜವಾದ ಹೆಸರು ಬಬ್ರುದ್ದಿನ್ ರಶೀದ್” ಎಂದು ಬರೆಯಲಾಗಿದೆ. ಈ ಪೋಸ್ಟ್‌ಗೆ ನೂರಾರು ಲೈಕ್ಸ್‌ಗಳು, ಕಮೆಂಟ್‌ಗಳು ಹಾಗೂ ಶೇರ್‌ಗಳು ಬರುತ್ತಿದ್ದು, ಧ್ರುವ್ ರಾಠಿ ತಮ್ಮ ಧರ್ಮ ಮರೆಮಾಚಿ ವಂಚಿಸುತ್ತಿದ್ದಾರೆ ಎಂಬ ತಪ್ಪು ಸಂದೇಶ ಹರಡಲಾಗುತ್ತಿದೆ.
ಸತ್ಯಶೋಧನೆ (Fact Check): ಅಸಲಿ ಸತ್ಯವೇನು?: ನಮ್ಮ ತಂಡ ಈ ಪೋಸ್ಟ್‌ನ ಸತ್ಯಾಸತ್ಯತೆಯನ್ನು ಪರಿಶೀಲಿಸಿದಾಗ, ಇದು ಸಂಪೂರ್ಣ ಕಪೋಲಕಲ್ಪಿತ ಹಾಗೂ ದುರುದ್ದೇಶಪೂರಿತ ವದಂತಿ ಎಂಬುದು ಸಾಬೀತಾಗಿದೆ.
ಧ್ರುವ್ ರಾಠಿ ಹಿಂದೂ ಜಾಟ್ ಕುಟುಂಬದವರು: ಧ್ರುವ್ ರಾಠಿ ಅವರು ಹರಿಯಾಣ ಮೂಲದ ಸಾಂಪ್ರದಾಯಿಕ ಹಿಂದೂ ಜಾಟ್ ಕುಟುಂಬದಲ್ಲಿ ಜನಿಸಿದವರು. ಅವರ ಶಾಲಾ-ಕಾಲೇಜು ದಾಖಲೆಗಳು, ಅಧಿಕೃತ ಪಾಸ್‌ಪೋರ್ಟ್ ಹಾಗೂ ಭಾರತ ಸರ್ಕಾರದ ಗುರುತಿನ ದಾಖಲೆಗಳಲ್ಲಿ ಅವರ ಹೆಸರು ಧ್ರುವ್ ರಾಠಿ ಎಂದೇ ಅಧಿಕೃತವಾಗಿ ದಾಖಲಾಗಿದೆ. “ಬಬ್ರುದ್ದಿನ್ ರಶೀದ್” ಅಥವಾ “ಬದ್ರುದ್ದಿನ್” ಎಂಬ ಹೆಸರಿನೊಂದಿಗೆ ಅವರಿಗೆ ಯಾವುದೇ ಸಂಬಂಧವಿಲ್ಲ.
ಹಳೆಯ ಸುಳ್ಳು ಸುದ್ದಿಯ ಮರುಬಳಕೆ: ಇದೇ ರೀತಿಯ ಸುಳ್ಳು ಸುದ್ದಿ 2024ರ ಲೋಕಸಭಾ ಚುನಾವಣೆಯ ಹೊತ್ತಿನಲ್ಲಿಯೂ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡಿತ್ತು. ಆಗ ಧ್ರುವ್ ರಾಠಿ ಅವರ ಹೆಸರು ‘ಬದ್ರುದ್ದಿನ್ ರಶೀದ್ ಲಾಹೋರಿ’ ಹಾಗೂ ಅವರ ಪತ್ನಿ ಜೂಲಿ ಪಾಕಿಸ್ತಾನಿ ಪ್ರಜೆ ಎಂದು ಸುಳ್ಳು ಕಥೆ ಕಟ್ಟಲಾಗಿತ್ತು. ಸ್ವತಃ ಧ್ರುವ್ ರಾಠಿ ತಮ್ಮ ಎಕ್ಸ್ (ಟ್ವಿಟರ್) ಹಾಗೂ ಯೂಟ್ಯೂಬ್ ಖಾತೆಗಳಲ್ಲಿ ಇಂತಹ ಅಪಪ್ರಚಾರಗಳನ್ನು ಸಾರಾಸಗಟಾಗಿ ತಳ್ಳಿಹಾಕಿದ್ದರು. ಅವರ ಪತ್ನಿ ಜೂಲಿ ಜರ್ಮನ್ ಪ್ರಜೆಯಾಗಿದ್ದು, ಇಬ್ಬರೂ ವಿಯೆನ್ನಾದಲ್ಲಿ ವಿವಾಹವಾಗಿದ್ದಾರೆ.
ಯಾವುದೇ ಅಧಿಕೃತ ಆಧಾರಗಳಿಲ್ಲ: ಮಹೇಶ್ ಅಣ್ಣಾ ತೇಲ್ಕರ್ ಅವರ ಫೇಸ್‌ಬುಕ್ ಪೋಸ್ಟ್‌ನಲ್ಲಿ ಯಾವುದೇ ಅಧಿಕೃತ ಮೂಲ, ದಾಖಲೆ ಅಥವಾ ಪುರಾವೆಗಳನ್ನು ಉಲ್ಲೇಖಿಸಿಲ್ಲ. ಕೇವಲ ಕೋಮು ದ್ವೇಷ ಪ್ರಚೋದಿಸಲು ಹಾಗೂ ರಾಜಕೀಯ ದುರುದ್ದೇಶದಿಂದ ಜನರಲ್ಲಿ ಗೊಂದಲ ಮೂಡಿಸಲು ಈ ರೀತಿಯ ಹಸಿ ಸುಳ್ಳುಗಳನ್ನು ಪೋಸ್ಟ್ ಮಾಡಲಾಗುತ್ತಿದೆ.
ಅಂತಿಮ ತೀರ್ಪು: ಸುಳ್ಳು (FAKE): ಯೂಟ್ಯೂಬರ್ ಧ್ರುವ್ ರಾಠಿ ಅವರ ಅಸಲಿ ಹೆಸರು “ಬಬ್ರುದ್ದಿನ್ ರಶೀದ್” ಎಂಬುದು ಸಂಪೂರ್ಣ ಆಧಾರರಹಿತ ಹಾಗೂ ಕಟ್ಟುಕತೆಯಾಗಿದೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಇಂತಹ ಪರಿಶೀಲಿಸದ ಪೋಸ್ಟ್‌ಗಳನ್ನು ಹಂಚಿಕೊಳ್ಳುವ ಮುನ್ನ ಜಾಗರೂಕರಾಗಿರಿ.
